KHAWTHLIR

Thisen pe
Evangelical Church of Maraland (ECM) ṭhalai pawl, Krizyhpa Thyutlia Py (KTP), Saiha College Veng pastor bialte chuan ECM KTP inkhawmpui thurel bawhzuiin nimin khan Saiha District Hospital-ah thisen unit 79 an pe a, a petute mipa 51 leh hmeichhia 28 an ni.

UN nen zirho
United Nations Development Programme (UNDP) Scoping Mission Team on Technical Assistance for Procurement Issues leh Mizoram sorkar ṭawngkawp chuan, nimin khan Secretariat conference hall-ah, ‘Procurement Issue’ zirhona an buatsaih a, Finance minister Lalsawta’n a hmanpui.

Zirtirtu indaih lohna sawiho
MZP headquarters, Champhai bultumin nimin khan Champhai College-a zirtirtu indaih loh chungchangah YMA sub-headquarters, MHIP, MUP, Champhai Ṭhalai Pawl leh Students Union-te an ṭhukhawm a; hmalak dan tur an rel. Champhai College-in zirtirtu an indaih lo hle niin an sawi a; a rang thei ang bera sorkar hotute dawr turin lamkal intirh a, awmzia a neih loh chuan a ṭul anga hmalak ni se, an ti.

MFA GB
Mizoram Football Association chuan vawiin chhun dar 12:00 hian Art & Culture Auditorium, Beraw Tlangah General Body Meeting an nei dawn a; Chief Minister Lal Thanhawla khuallian a ni ang.

Mipui zirtir rel
Champhai District Consultative Committee, District Level Review Committee leh District Level Security Committee chu nimin khan Champhai DC H Lalengmawia hoin DC conference hall-ah an ṭhukhawm a; bank kaihhnawiha inbumna laka mipui an fihlim theihna atan mipuite zirtir thar leh an rel.

SSU pearl jubilee
Students' Self-Support Union (SSU) chuan nimin khan CEV Resort-ah SSU kum 30 tlinna, Pearl Jubilee an lawm a, leadership training an nei nghal.