Chakma leh Bru-te chungchang CYMA-in Rijiju hnenah thlen

Mizoram rawn tlawhtu Union minister of state for Home Kiren Rijiju chu Central YMA hruai­tute chuan Thawhlehni zan khan a thlenna State Guest House-ah an kâwm a; Chakma leh Bru chung­changa an ngaihmawhte an thlen.

CYMA hruaitute chuan Home Minister hi Tripura transit camp-a Bru awmte zingah hruai kîr tum an nih huna Mizorama lêt duh lote chu Mizoram electoral roll aṭanga paih tur leh Tripura refugee transit camp titawp turin an ngen a; Chakma chungchangah chuan, Bangladesh aṭanga dan loa Chakma-te an lo luh lohna tur­in ramrìa BSF duty-te tichak turin an ngen.

Vanglaini palai zawhna chhangin, Central YMA hruaitute chuan, an thu thlente chu lo enzui a tum thu Kiren Rijiju chuan a lo hrilh tih an sawi.

Hetih lai hian, Chakma Foreigner Census neih an tum bawhzuina atan Central YMA team-te'n nimin khan CYMA general secretary Vanlalruata leh finance secretary Lalrochhuanga hoin Chawngte an pan a; pre-survey an nei dawn a ni.