Task Force on Poverty Alleviation-in State zawng zawng ang khata teh tha ti lo

Task Force on Poverty Alleviation chuan nimin khan UD&PA minister Zodintluanga hoin a pisaah a vawi khat nan an ṭhukhawm a; retheihna ûmbo hna thawh dan tura Central-in state hrang hrangte tehfung pakhat hmanga a teh ṭhin chu a fel tawk lo hlea an ngaih thu an tarlang.

India ramah retheihna tihbo a nih theih nan NITI Aayog Governing Council chuan state tinah hma latu tur Task Force on Poverty Alleviation din ni se a ti a; chumi ang chuan Mizoramah pawh Task Force on Poverty Alleviation chu din a ni.

Minister Zodintluanga chuan, Task Force on Poverty Alleviation din a ni chu lawmawm a tih thu sawiin, "Mizoram sorkarin mirethei zawkte dinhmun chawi kanna tur NLUP a buaipui mek laiin, a belhchhahna tur Central sorkarin a duang leh hian sorkar kutkê a tichak lehzual ngeiin a rinawm," a ti.

Zodintluanga chuan, Task Force on Poverty Alleviation chu sorkar laipuiin a hman ṭangkai tak tak dan tur hriat ni rih lo mah se, an department chan ṭheuhah mirethei leh mi harsa zawkte dâwm kanna programme an neih ṭheuhte hlâwk leh awmze nei zawka kalpui turin meeting-a tel officer-te a ngen a ni.

Meeting chuan, retheihna ûmbo hna thawh kawnga sorkar laipuiin state hrang hrangte tehfung pakhat hmanga teh a, sum pek tur a bituk leh tih tur a tuk ṭhin chu fel lo an tih thu an sawi a; 'NITI Aayog hian Central aṭanga rem leh rem loa tih tur intuk ngawt loin state milin programme leh scheme-te duang se, state mamawh leh state tana ṭangkai tur scheme-te rilru zau tak púa duang turin NITI Aayog-ah thlen ni se,' an ti.

Retheihna ûmbo leh miretheite dinhmun chawikanna lam kaihhnawih programme enkawltu department hrang hrangte programme pawh a theih chinah huang khata luantir ṭha an ti bawk.

Task Force on Poverty Alleviation-ah hian mirethei zawkte dâwm kanna lam haw scheme leh programme enkawltu department hrang hrang - Urban Development & Poverty Alleviation; Rural Development; Public Health Engineering; Labour, Employment & Industrial Training; Industries; Cooperation; Agriculture; GAD; Finance leh Planning department secretary-te member an ni.