Hnam bil hminga pawl din hi a ṭha lo - R Romawia

Art & Culture minister R Romawia chuan, hmun hrang hranga hnam bil puala pawl hrang hrang din a ni ṭhin chu ṭha lo a tih thu a sawi.

R Romawia hian Thawhlehni khan Hliappui khuaah Suak­phunga Heritage Centre a hawng a; hawnna inkhawmah thu sawiin, “YMA-te’n hnam inpumkhatna kalpui a tum viau laiin, hmun hran hranah hnam bil puala pawl hrang hrang ding a awm ṭhin hi a ṭha lo hle a ni,” a ti.

Zo hnahthlakte min ṭhûi­khawm turin Art & Culture department dinhmun a pawimawh tih sawiin, R Romawia chuan, “Kan Mizo pipute hmun hlui zawng zawng hi Art & Culture department chuan a humhalh zel dawn a ni,” a ti a; Art & Culture department hmalakna ṭawiawm turin Mizo mipuite a sáwm a ni.

Suakphunga Heritage Centre hawnna inkhawm hi Hliappui VC president Lalṭhaliana’n a kaihruai a, Art & Culture director R Hmingthanzuala leh deputy director K Lalruala te pawhin an hmanpui.

Suakphunga Heritage Centre hi 13th Finance Commission award aṭanga sum hmuh hmanga sak a ni a, chhâwng hnih a ni. A chhawng hnuai zawkah multipurpose hall, rural museum, rural library, dining hall leh choka a awm a, a chhawng chung zawkah mi pathum thlen theihna pindan a awm thung.