MPC-in hmathlir nei thui loah puh
MPC party chuan resolution siamin, Mizorama sorkarna chelh tawhtu - MNF leh Congress-te'n ram leh hnam tan hmalakna nei ve mah se, Brig. T Sailo anga hma lam thlirna thui tak an neih loh avangin Mizoram chu state hnufual tak a la ni reng niin an tarlang.
MPC hian nimin khan an party pisaah State Council Meeting an nei a, resolution an siam bakah, an party dintu Brig. T Sailo hmachhawp tawh - six basic needs tihhlawhtling turin inhlanna thar an nei a ni.
MPC resolution chuan, Economic Survey-a a lan danin, kut hnathawktute thawhchhuah a tlahniam telh telh nia sawiin, "Mizoram pum thawhchhuah aṭangin 2009-2010-ah kut hnathawktute thawhchhuah chu 20% a ni a, kum 2011-2013-ah 19%-ah a tla a, kum 2013-2014-ah phei chuan 16.26% chauh a ni," an ti a; miretheite an dam khawchhuahna turin MPC chuan theihtawpa hma an lak zel dawn thu an sawi.
January 14, 2011-a Vanapa Hall-a NLUP hawn a nih aṭanga kum li hnu leh chhungkaw 13,50,00-in ṭanpuina an dawn hnuah pawh kut hnathawktute thawhchhuah a tlem telh telh nia sawiin, MPC chuan, NLUP-a bawng sem hnuah pawh bawnghnute thar chhuah a tlem zawk niin an sawi a, "Mizoram chu India ram state rethei zual paruk thlanchhuahah kan awm ta reng mai a, kan hma lamah hmasawnna êng hmuh tur a awm si lo," an ti.
MPC inkhawmah hian kumin April 30-a village council leh local council inthlana MPC party ticket-a thlan tlinte chawimawina hun an hmang a; Brig. T Sailo leh hruaitu dang thi tawhte sûnna hun an hmang bawk.
MPC president Lalhmangaiha Sailo chuan, T Sailo chuan a hmathlir leh Mizoram tana a hmachhawpte chu MPC party-te a hnutchhiah tih sawiin, "Hengte avang hian a thlarau chu a nung reng dawn a, kan party pawh a nung reng ang," a ti.