NLUP hnuaia MEFCOF telh thar hawng NLUP-ah ramngaw leh nungchang humhalha tel - CM

NLUP Implementing Board (NIB) hnuaia ramngaw humhalh hna thawk turin Mizoram Environment & Forests Consultative Forum (MEFCOF) telh thar a ni a; a bul ṭanna chu nimin khan chief minister Lal Thanhawla’n IPR Auditorium-ah a hawng.

Chief Minister chuan, NLUP hmanga hmalakna ṭhenkhat zingah ramngaw, nungcha leh lui humhalh a tel tih sawiin, humhalh kawnga chak zawk leh changtlung zawka hmalak a nih theih nan MEFCOF hi NIB-a telh ve a nih thu a sawi a, “MEFCOF thil tum ber - ramngaw, nungcha leh lui tuihna kang chat mek humhalh hi thil pawimawh tak a ni,” a ti.

Boruak lum chho zelin boruak a tichhe mek tih sawiin, Lal Thanhawla chuan, “He mi siam ṭhat nan hian NLUP kan kalpui a, khawvelin a buaipui ber siamṭhatna hi NLUP hian a keng tel a ni,” a ti a; tlang ram loneih bànsan a nih hunah chuan ramngaw chêreu mekte chu ṭha thar lehin, sik leh sa nuam zawk a awm leh tur thu a sawi.

Khualzahawm, NIB chairman JH Roṭhuama pawhin thu sawiin, “Ram enkawlnaah mikhual angin kan awm a, kan chhehvela hun rei tak lo awm tawh thing leh mau, nungchate kan timang a, kan tuihnàte a kanchah phah nasa a ni. Hengte siam ṭha tur leh thing leh mau thlenga humhalh hna thawk tura MEFCOF-in hma a rawn la hi a lawmawm tak zet a ni,” a ti.

MEFCOF hi kum 2004-ah mi ṭha­hnemngaite’n an din a ni a; ramngaw humhalh hna kalpuiin, hmun hrang hrangah ramngaw humhalh bik, Zotheihuan an siam a ni. Zotheihuan hi Mizoram hmun 46-ah an din tawh a, chu’ng Zotheihuan 46-te zau zawng belhkhawm chu sq.km. 2,150 a tling.

Inkhawm hi MEFCOF president VL Bela’n a kaihruai a; MEFCOF general secretary C Thanmawia chuan kum 2014-15 chhung khan hmun hrang hrangah thing ṭiak 3,050 an phun thu a sawi.