Sum dinhmun thlirin VC term kal mek titawi

23rd November, 2024

Mizoram sorkar chuan Mizoram puma village council term kal mek chu a titawi a, February 19, 2025-ah a tawp dawn. Local Administration department minister C Lalsawivunga chuan, sorkar sum dinhmun thlirin VC term tihtawi a nih thu leh, VC term kum 5 chu tihtawi a la nih loh thu a sawi.

VC term tihtawi chungchangah hian LAD Secretary chuan November 20, 2024-ah hriattirna (notification) a tichhuak a ni. VC term kal mek hi kum 5 atan a ni a, VC inthlanpui hnuhnung ber chu August 27, 2020 khan neih niin, September 4, 2020 hmain VC-te chu din (form) a ni. Kum 5 term a nih avangin kum 2025 August tla tawp vela tawp tur a nih laiin, sorkarin February 19, 2025-a tàwp turin a ti ta a ni.

Vanglaini zawhna chhangin LAD minister C Lalsawivunga chuan, a hun hmaa VC term tihtawp chhan ber chu inthlan buatsaih a hautak avang leh sum leh pai dinhmun ṭhat tâwk loh vang a nih thu a sawi a, "Sorkar kum 2025-26 chhunga hnawhsarum taka inthlan pali buatsaih chu a hautak dawn lutuk a, chuvang chuan a hautak ber VC inthlan hi kan tih hma theih nan VC term tihtawi a ni," a ti.

C Lalsawivunga chuan, 15th Finance Commission-in Mizoram tana sum a pek a tlem tial tial tih sawiin, "Kum 2021-22 ah vbc. 1,790, kum 2022-23 ah vbc. 1,615, kum 2023-24 ah vbc. 1,470 leh kum 2024-25 ah vbc. 1,079 min pe a, nakkum 2025-26 ah vbc. 586 min pe leh ang," a ti a; term kal mek ang chuan kum 2025-26 chhungin VC bakah local council leh LADC buatsaih a ngaih dawn thu a sawi.

VC term pawh tawi chu dan ang taka tih a nih thu sawiin Lalsawivunga chuan, "VC dan kan hman laiah hian VC term hi thla 18 pawh sei leh pawh tawi theih a ni. VC term kan pawh tawiah hian dan bawhchhiatna a awm lo a, dan ang taka tih a ni a, mipui ṭhat tlanna tur zawka tih a ni," a ti.

LADC Minister chuan zawhna chhangin, VC term khat - kum 5 chu tihtawi a la nih dawn loh thu a sawi a, "Term rei zawng chungchang hi Drafting Committee-in a ngaihtuah mek a, pawl hrang hrangte ngaihdan kan la tawh. Tun dinhmunah chuan term rei zawng tihdanglam a la ni lo ang," a ti a, thuthlukna thar a la awm loh thu a sawi.