National Painting Competition buatsaih

Mizoram State Council for Child Welfare (MSCCW) chuan nimin khan PC Girls School-ah National Painting Competition an buatsaih a, naupang 181 an tel. Intihsiak kharna leh lawm­man semna inkhawm chu MJA Gen.Hqrs president C Lalrambuatsaiha'n a hmanpui.

Nimina National Painting Competition hi MSCCW-in a buatsaih ṭum vawi 15-na a ni a, sikul 19 aṭangin zirlai naupang 181 an tel. Naupangte chu hlawm li - kum 5-9 inkar, kum 10-16 inkar bakah, vohbik naupangte tan bik kum 5-10 inkar leh kum 11-18 inkarah ṭhen an ni.

Kharna inkhawma khuallian MJA president C Lalrambuatsaiha chuan, hnam fing leh changkang apiangin lemziak an ngaihlu a, lemziak thiamte an ngaisang ṭhin tih a sawi a, "An lemziak leh a ziaktute pawh hnam ro hlu-ah an ngai a, a ziaktute thih hnu kum tam tak hnuah pawh an kutchhuak hlui tak takte pawh cheng tam tak takin an la lilám ṭhin," a ti a; zirlai naupang, lemziak lama tuite chu hmasawn zel tura ṭan la tur leh theihna pho chhuak zel turin a fuih.

Intihsiakah hian hlawm palia ti ṭha ber ṭheuhte chu lawmman atan Lalzarliani Hmar Award (Rs 5,000 leh thuchei) hlan an ni a; ti ṭha dang - hlawm palia mi pali ṭheuh hnenah Honourable Mention Award (Rs 1,500 leh thuchei) hlan a ni. Inelnaa tel zawng zawng hnenah thuchei leh TA/DA pek a ni bawk.

National Painting Competition-a lemziak pakhatna aṭanga pathumnate chu Indian Council for Child Welfare, New Delhi-ah thawn a ni dawn a, state danga lemziakte nen ineltir a ni dawn. India ram puma lawmman la an awm chuan New Delhi-ah an kal lam leh haw lam, ei leh in tumsakin vek a ni dawn a; kum 18 an tlin thleng scholarship pek tur a ni bawk.