Khawtlangin ruihhlo vangin in kalh

All NGO, Thenzawl chuan an khaw mi Gospel Lalruatfela leh a nupui Evi Lalramhluni te chu ruihhlo zawrh an sim duh lo nia an ngaih avangin November 21, Ningani khan an chenna in an kalh.

In kalh hmain Thenzawl NGO-te chuan Gospel Lalruatfela te nupa chu November 20, 2024 ral hma ngeia Thenzawl chhuahsan turin an lo ti tawh a, "Thenzawl khawtlangah ruihhlo nasa taka tidarh a, zuartu lian tak an ni leh thuneitute hnena hlan an ni chung pawha an sim thei lo leh, Thenzawl khua tiṭâwp zui zeltu an nih avang hian Thenzawl All NGO leh veng hrang hranga ruihhlo do pawl leh, khawtlang hruaitu kal khawmte'n an chungchang an ngaihtuah hnuah Thenzawl khaw chhunga awm zui zel tawh lo tura tih an ni," an ti.

Thenzawl NGO-te hian Gospel Lalruatfela te gate-ah, 'Khawtlang duh loh ruihhlo mansak avangin he in hi khawtlangin a kalhsak a ni,' tih an târ a ni.