State páwna hna thawk turte thlah

Mizoram Youth Commission (MYC) chairman Malsawmzuala Ralte chuan nimin khan MYC leh Honda India Foundation buatsaih Project Buniyaad Hotel Management (Food & Beverages) training zo, Mizoram pawna hna thawk tur mi 26-te thlahna hun a hmanpui a; hlawh hmu tlaka thawk turin a chah.

Malsawmzuala Ralte chuan, ṭhalai 26-te chu an thawhna hmunah rinawm turin a chah a, "Pathian ṭih chung leh inpumpekna tak tak nen hotute duhsak tlakin hna thawk ang che u. Mi dang tana kawng sât kawtu in ni a, Mizote tihmingṭhatu leh Mizo mipui aiawh in nihnate chu hre reng u la, chhel taka awmin hlawh hmu tlak ngeiin hna thawk ang che u," a ti.

Project Buniyaad Hotel Management (Food & Beverages) training zote hi mipa pakua leh hmeichhia 17 an ni a; Fairmont (Udaipur), Choki Dhani (Jaipur, Jaisalmer, Indore), Orange Tiger (Goa), Sarvar Hotel (Hyderabad) leh Status Club (Kanpur)-ahte an thawk dawn. Hotel neitute Mizoramah rawn kalin, training zote chu interview an neihpui hnuah thawk tur an thlang a ni.

Project Buniyaad Hotel Management (Food & Beverages) Training hi chief minister Lalduhoma'n September 18, 2024 khan MYC auditorium-ah a hawng a; tunah hian Aizawl Centre-ah batch hnihnate an training leh mek; Lunglei Centre-ah training kalpui mek a ni bawk. December 2024 aṭangin Aizawlah training batch thumna kalpui leh tum a ni.