Adani chhui tur JPC din a nih theih nan MP-te au turin duh

Mizoram Pradesh Congress Committee (MPCC) treasurer Dr Lalmalsawma Nghaka chuan nimin khan Aizawl Press Club-ah thuthar thehdarhtute a kâwm a; Gautam Adani leh a thawhpui pasarihte thil tih dik loh chhuitu tur Joint Parliamentary Committee (JPC) din a nih theih nan Mizoram MP-te au chhuak ve se an duh thu a sawi.

Dr Lalmalsawma Nghaka chuan, US-a Securities Exchange Commission (SEC) tlukpui Securities Exchange Commission (SEC)-in Gautam Adani leh a thawhpui pasarihte'n India rama solar power contract man to tak tak an hmuh theih nan thamna cheng vbc. 2,000 an pe niin an tarlang tih a sawi a, "US SEC hian kum 2020 leh 2024 inkar khan Adani leh a thurualpuite hian lndia sorkar official-te hnenah hlâwkna cheng maktaduai 16,000 chuang contract an hmuh theih nan thamna an pe niin sawi a ni," a ti.

Contract-te chu Andhra Pradesh, Chhattisgarh, Jammu & Kashmir, Odisha leh Tamil Nadu-ahte a awm tih sawiin Lalmalsawma chuan, "Hriat tur pawimawh tak chu heng state zinga pali hi eptu party sorkarna a ni a, J&K chu President’s Rule hnuaiah centre-in direct-in a enkawl a ni," a ti a; tun hnaia BJP-in a thunun state Rajasthan leh Maharashtra-a solar power man to lutuk contract-ah pawh thamna a awm niin a sawi.

MPCC Treasurer chuan, sum tam tham lo zawkah party dang chief minister-te chu an thubuai pawh finfiah loa jail-a dah an nih thu sawiin, "White-collar crime chhui tura ruat institution - SEBI, Enforcement Directorate (ED), Central Bureau of Investigation (CBI) leh Income Tax-te chuan Adani hi rintlak taka puhna awm chung pawhin an chhui zo duh lo mai ni loin, thuneitu sang zawkte thupek avanga chhui chianna pawh nei mumal loin tihtawp a ni," a ti.

Dr Lalmalsawma chuan, thamna thubuai lian tak tak finfiahna rintlak Congress party-in a nei nia sawite chu JPC-in a chhui chian an phût tih sawiin, "Mizoramin MP pahnih kan nei a, Mizo mipui zawng zawng aiawh an ni. JPC din a nih theih nan Parliament-ah au chhuak ve ngei se kan duh. He case hi a nêp lo," a ti a; nakinah chuan Mizoram min la nghawng thei tur thil a nih thu a sawi.