Youth Festival tel turin ṭhalaite sâwm

Viksit Bharat Young Leaders Dialogue - National Youth Festival 2025 chungchangah nimin khan Sports & Youth Affairs department, Sport Authority of India, NYKS leh State NSS hotute'n Aizawl Press Club-ah thuthar thehdarhtute an kâwm a; Festival-ah a tam thei ang ber tel turin Mizo ṭhalai an sáwm.

SYS deputy secretary Marilyn Rualzakhumthangi chuan, January 11-12, 2025 chhungin National Youth Festival 2025 (NYF) hman a nih dawn thu a sawi a, "Prime Miniser-in a thlir ber chu ram puma ṭhalai hruaitu chher chhuah thar nuai khat tal neih a ni. He platform hian ṭhalaite talent hai chhuah te, mawhphurhna lak thiam te, Viksit Bharat hmathlir tihlawhtling tura ṭangkaina an neih theih dan tur hai chhuahte a ni," a ti.

Viksit Bharat Young Leaders Dialogue-ah hian kum 15-29 inkarte NYF 2025 lawmna pui ber Delhi-a neih turah an tel theih nan Vikshit Bharat Challenge-ah an inziah luh a ngai a, https://mybharat.gov.in/ kaltlangin inziah luh theih a ni.

Vikshit Bharat Challenge hi 'India's Landmark Achievement' tih thupui hmangin state level-ah quiz, essay writing/blog writing leh presentation hmanga intihsiak a ni dawn a, inelna chi thum paltlangte chu national championship-ah an tel ang. Quiz hi November 25 - December 5, 2024 chhungin neih a ni dawn a, national championship chu NYF hmanna pui ber Bharat Mandapam, Delhi-ah January 11-12, 2025 chhungin neih a ni ang.