VC/LC draft electoral roll tlangzarh

Village council leh local council inthlan leh huna hman turin district hrang hranga district election officer-te chuan nimin khan an district chhung bika draft electoral roll an tlangzarh.

VC/LC electoral roll ennawn turah hian January 1, 2025-a kum 18 tling chin thun tur a ni a, December 9, 2024 thleng electoral roll aṭanga paih, thun thar, siamṭhat ngai leh insawn duhte tan dilna hun hawn a ni dawn. Dilna lutte chu December 10-19, 2024 chhungin endik a ni ang a; final roll chu January 8, 2025-ah tihchhuah a ni ang.

Aizawl district bikah chuan draft roll-ah hian AMC huam chhungah chuan in 64,077-ah voter 2,33,092 awmin, mipa 1,08,620 leh hmeichhia 1,24,472 an ni a; VC-ah chuan in 17,877-ah voter 62,629 awmin, mipa 30,573 leh hmeichhia 32,056 an ni.