Ruihhlo ngai pual camping Excise Minister-in a tlawh

United Pentecostal Church, Mizoramin ruihhlo ngaite puala Apostolic Theological Institute, Durtlanga camping a buatsaih chu nimin tlai khan Excise & Narcotics minister Lalnghinglova Hmar-in a tlawh.

Excise Minister chuan camping-a lutte hmaah thu sawiin, beidawng loa ruihhlo sim duh tak takna thinlung nen camping chhuahsan turin a chah a, "Ruihhlo bâwih ata tâl chhuak turin Pathian ṭanpuina a ngai a, chumi bakah chuan mihringin tih ve tur a nei a, sim duh tak takna a pawimawh," a ti.

Lalnghinglova Hmar chuan, Mizoram UPC-in Mizo ṭhalaite veia a taka pên chhuaka ruihhlo ngaite puala camping an buatsaih chu ropui a tih thu a sawi a, "Sorkarin ruihhlo do turin theihtawp a chhuah a, mahse, a tâwk zo lo a, tlawmngai pawlte leh kohhran nen ṭanho a ngai," a ti a; kohhran a chet chuan awmzia a nei lian ṭhin tih a sawi.

Camping-ah hian khua leh veng 30 aṭangin mi 52 an lut a ni.