ZPM ram tun din an tum - Thanzara

Mizoram Pradesh Congress Com-mittee (MPCC) president Lal Thanzara chuan, ZPM sorkarin mipuite damdawi khà an eitir laiin, anmahni'n lallipop an hmuam niin a sawi a, Pathian ram ni loa ZPM ram tun din tumah a puh.

Lal Thanzara hian nimina Congress Bhavan-a political session-ah thu sawiin, "ZPM-in mipui damdawi khà min ei tir a, anni chuan lallipop an hmuam thung. MNF khan bawhzui tur dik an bawhzui loh avangin tunah hian buaina a thleng a, ZPM lahin zirlaite hmakhua an ngaihtuah loh avangin tunah he harsatna hi a thleng," a ti a; zirlaite ngaihsak sorkar mamawhzia Mizoramin a hmu mek thu a sawi.

Congress President chuan ZPM chu duhsak bik nei lo tura intiamte an nih laiin, thuneihna a ni lo zawnga hman chíng an niin a sawi a, "Ram rorelnaah Pathian ram tun din tumtute hian Pathian ram ni loin ZPM ram tun din an tum avangin mipuiin an aiawha an thlan khawtlang enkawltu party dang an en hran tlat avangin Sinlung Hills Council enkawl tura mipuiin an thlan tlinte pawh an ṭhiat duh mai ang tih a hlauhawm hle," a ti.