Min beitute an ral zel - MNF Adviser

MNF party chuan nimin khan an pisa Mizo Hnam Rûnah chhung inkhawm an hmang a, thusawitu TC Pachhunga, MNF adviser chuan, MNF chu beih tâwk nasa ber ni mah se, a beitute an ral zel niin a sawi.

TC Pachhunga chuan, MNF chu hnam movement kengtu an nih thu sawiin, "MNF hi beih tâwk nasa ber kan ni a, mahse, min beitute an ral zel. Hnam kengtu kan nih tlat avangin rambuai kum 20 chhung khan mi tihchimih vek duh mah se, an thei lo. Mizo nationalsim kengtu kan nihna hi tu mahin min chhuhsak thei lo. Chauh cháng nei ṭhin mah ila, a hun takah Pathianin min tinung leh ṭhin," a ti.

TC Pachhunga chuan, ZPM-in thla 11 sorkarna an chelh tawh chhungin hmasawnna hnathawh sawi tur an nei lo a, mipuite tawrhna hlirin an kal chho niin a sawi a, "An sorkar hi a bilhah a tho lo a, mipuite'n keimahniah beiseina sang tak an nei a ni," tiin, ṭan la turin MNF party mite a chah.