Tlawmngai pawlte leh party-te’n Bru-te Mizorama kîr turin an duh
Mizorama political party leh tlawmngai pawl hrang hrangte chuan Tripura transit camp-a Bru-te chu Mizoramah thlamuang takin kîr thei thei se an duh thu an puang.
Home minister R Lalzirliana hoa political party leh tlawmngai pawl hrang hrang hruaitute Nilainia ṭhukhawm chuan, Tripura-a Bru-te hruai kîr dan tura sorkar ruahmanna an thlirho a; sorkar thuneitute chuan ruahmanna an kalpui tawh dan te, sum an hmuh dante leh hmalak an tum dante an tarlang.
Political party leh tlawmngai pawl hrang hrangte chuan, Bru-te Mizorama hruai kîr tura sorkar inpuahchahna chu ṭha an ti thu an sawi hlawm.
Meeting-ah hian Bru lâk kîr turte chu kum 1995 Mizoram electoral roll-a chuangte leh an thlah kal zel chauhte an ni tur a ni tih chu political party leh tlawmngai pawlte dinna a la nih reng thu an tarlang a; a hmaa thu an dah tawh angin, kum 1995 Mizoram electoral roll-a chuang Bru leh an thlahte chu Mizoram mi dik taka pawm ni se, an ti.
Tripura refugee camp-a awmte hi June thla tìr lamah Mizorama hruai kìr tum a ni a; chung mite awmna tur chuan Mamit, Lunglei leh Kolasib district-ahte hmun thlan fel tawh a ni. Bru lak lêtte chu Mizoram an chhuahsan hmaa an awmna khua ṭheuha dah tura tih an ni a, an awmna khua a ram tawh chuan an awmna Assembly bial chhunga dah tum a ni.
Hetih lai hian, Bru lak letnaa a taka hna thawktu tur administrative officer chu nimin khan Mamit-ah thil tih dan tur zirtir an ni a; Bru hruai kîrte hnena free ration, free medical camp, venhimna leh chhawmdawlna sum pek dan tur leh an mawhphurhna te, Kanhmun Facilitation Centre leh DC office nena thawhho dan tur te, Bru lak lette dahna tur khuaa Village Resettlement Committee-te nena hna thawhho dan tur zirtir an ni.
Mamit district bikah Bru lak lette chu khaw 48-ah dah an ni dawn a, khaw 48-te chu AO 47-in an ṭhutchilh dawn a ni.
Hetih lai hian, Union minister of state for Home Kiren Rijiju chuan, tripura-a awm mek Bru zingah Mizorama kîr duh lote chu tihngaihna a awm loh thu a lo sawi tawh a ni.