KHAWTHLIR

Thisen pe
Boston Higher Secondary School, Mission Veng chuan nimin khan Aizawl Civil Hospital-ah thisen unit 59 an pe a, a pertute mipa 46 leh hmeichhia 13 an ni. Rangvamual Branch KṬP pawhin Central KṬP Blood Donation Calendar angin nimin khan Synod Hospital-ah thisen unit 12 an pe a, a petute mipa 10 leh hmeichhia pahnih an ni.

Meth 14,000 man
Mizoram police hnuaia CID (Crime) Special Narcotic team leh BSF ‘G’ team-te chuan Nilaini zan dar 7:30 vel khan Lalrinzuala (44) s/o Zokhuma (L), Tlangnuam Vengthar nia insawi hnen aṭangin Zarkawtah Methamphetamine mûm 14,000 (kg. 1.4 a rit) an man a; thubuai siamsakin, nimin khan Court-ah an hruai. Meth an mante hi Rs. 42,00,000 vel; hû a ni.

Hrui chinfel dan tur sawiho
Aizawl Beautification Committee thurel bawh­zuiin nimin khan Aizawl DC Dr Franklin Laltinkhuma hoin Ai­zawl­a local council hotu te, telephone service provider te, cable television operator aiawhte leh sorkar official-te'n Ai­zawl khawpui chhung­a telephone leh cable TV hrui thlun hnawk zualte felfai zawka thlun dan tur an sawiho.

Building hawng
RMSA sum hmanga Govt. Maubawk High School building sak thar chu nimin khan parliamentary secretary (Education) Joseph Lalhimpuia'n a hawng.

Tanpuina sem
Lungleia Fisheries department chuan nimin khan Lunglei IPR conference halh-ah RKVY scheme hnuaia sangha dîl thar siamna tur leh sangha no khawina (rearing area) siamna tur mi 36 hnenah an sem. Nimina ṭanpuina an sem rasl hi Rs. 8,40,000 a ni.

MST bus titawp
Transport department chuan thuchhuah siamin, fûr ruahtui a tlak leh tâk avangin Aizawl leh Zohmun inkar MST bus chu kawng ṭhat tawk loh avangin tihtawp lailawk a nih dawn thu an tarlang.