MFA-in General Body Meeting an nei

Mizoram Football Association (MFA) chuan nimin khan Berawtlanga Art & Culture Auditorium-ah General Body Meeting an nei a; khuallian, chief minister Lal Thanhawla chuan, ṭhalaite theihna (talent) cho chhuah thiam a ṭul thu a sawi.

Chief Minister chuan, Mizo ṭhalaite'n talent cho chhuah tham an nei tih sawiin, "A cho chhuah dan lamah kan thiam hle a ṭul. Infiamna lamah football-ah ringawt pawh nasa takin hmasawnna hmuh tur a awm a, hei hi association-te thawhrimna leh ṭanrual vang a ni," a ti.

Lal Thanhawla chuan, sorkar hmalaknate chu er tâwk leh tisukuk duhtu an awm ṭhin avangin, sorkar hmalakna aiin khawtlang leh pawl anga hmalakna a hlawhtling duh zawk fo tih a sawi.

Hmasawnna hmuhte chapopui a hlauhawm tih sawiin Lal Thanhawl­a chuan, "Pathian malsawmna leh kaihhruaina vang chauh nei kan ni tih kan hriat a ṭha. Mizoramah industry leh corporation-te a awm loh avangin sorkar chauh hi hna pe thei a ni rih a, mahse hna pek sen vek an ni lo. Chuvangin, kan ṭhalaite hi páwn lamah a tam thei ang ber thawn chhuah theih dan sorkarin a ngaihtuah a ni," a ti.

MFA president Lal Thanzara chuan, football-ah tun hmaa Mizoramin a la tawn ngai loh tawn chhoh mek a ni tih sawiin, "Santosh Trophy leh National Games-ahte champion nihnate kan la a, hei hi Pathian ṭanpuina vang a ni. I-League kan thlengte hi Mizoram, a bikin MFA tan bung thar a ni," a ti a; football-in hma a sawn theihna atana Mizoram sorkar hmalaknaah lawmthu a sawi.

MFA General Body Meeting hi senior vice president PC Vanlal­hruaia'n a kaihruai a; chawhnu lamah rorel inkhawm leh hruaitu thar thlanna hun an hmang.

Kum 2015-2019 chhunga MFA president-ah president ni lai Lal Thanzara thlan a ni a; senior vice president-ah PC Vanlalhruaia, vice president-ah KC Lal­­rinmawia, honorary sec­­retary-ah Lalnghinglova Hmar, treasurer-ah Tuikhuahthanga, joint secretary-ah C Vanlalmawia leh financial secretary-ah Lalruatsanga Tochhawng te thlan an ni.