KMMTTP-ah hna 62% thawk zo tawh

29th May, 2015

Kaladan Multi Modal Transit Transport Project (KMMTTP) kawngpui siam hna thawh mek chu PWD engineer-in-chief R Vanlaltluanga'n Nilaini khan a enfiah a, contractor-te chuan hna 62% vel an zawh tawh thu an lo hrilh.

Sorkar thuchhuah tarlan danin, KMMTTP kawng hi a tirah chuan Lawngtlai aṭanga Myanmar thlengin km. 99.83 tura ruahman a ni a; hmun ṭhenkhatah kawng kual laite siam rem a nih hnuah, km. 90 vela zawh theih beisei a ni.

Kawng siam hna hi contractor pahnih - RDS Project Ltd. leh ARSS Project Ltd. ten an thawk a, sum ruahman cheng vbc. 677 aṭangin cheng vbc. 419.07 vel hmangin 62% hna an zo tawh.

Tun dinhmunah kawng hi km. 8 vel chu mumal taka laih zawh fel a la ni lo a, km. 65 chu lung phah zawh tawh niin, km. 6 vela thui chu blacktoping tih zawh tawh a ni. Kawng chhuat hi metre 12-a zau tur a ni a, chhuat záwlah metre 11.4 chin lung phah tur a ni.