Noida-a training tur mi 51 thlah

Nimin khan ATI conference hall-ah Mizoram Youth Commission (MYC) leh Labour, Employment & Industrial Training (LEIT) department hmalakna hnuaia Study By Janak (SBJ) Centre of Excellence, Greater Noida hmuna thla ruk chhung training tur Mizo ṭhalai 51-te thlahna hun hman a ni a; govt. deputy chief whip RL Pianmawia’n a hmanpui.

RL Pianmawia chuan, training turte chu mahni intodelh nana sorkar sensoa thiam thil zir chhuak tura an kal thei chu an vanneihzia hre turin a chah a; tumruhna leh chhelna nena training tura chahin, hnam dangte zingah an zia leh nunphungte uluk taka zir chung a, thawmhnaw inbel kawngah leh nungchangah fimkhur turin a fuih.

MYC hian kum 2011 aṭang khan ṭhalai hna nei lote hmun danga an thawh theih nan training turin a tir chhuak ṭan a, tun thleng hian mi 1,000 chuang an tír chhuak tawh. Tuna training-na tur senso hi sorkar laipuia Ministry of Labour & Employment aṭanga sum hmuh hmanga buatsaih a ni.