HSLC leh HSSLC-ah complaint 302 dawng

Mizoram Board of School Education (MBSE) chuan kumina HSLC result tihchhuah takah mark hmuh zata lungawi loh vanga ennawn dilna 131 an dawng a; HSSLC result-ah complaint 171 dawn a ni.

Vanglaini palai zawhna chhanga MBSE hotute'n an sawi danin, kumin HSLC result tihchhuahah mahni mark hmuha lungawi lo zirlai 131-in complaint an thehlut a; chungte chu re-evaluation dil zirlai 72 leh post-publication scrutiny dil zirlai 59 an ni.

HSLC-ah hian kum 2014-ah erawh chuan complaint thehlut mi 155 an awm a; chungte chu re-evaluation dilna 62 leh post-publication scrutiny dilna 93 a ni.

Kumina HSSLC exam result-a complaint thehluh 171 an awm a; chungte chu re-evaluation dilna 95 leh post-publication scrutiny dilna 76 a ni. Kum 2014-ah khan re-evaluation dil mi 92 an awm thung.

MBSE dan angin, HSLC leh HSSLC result-a mahni mark hmuha lung­awi lote'n result chhuah aṭanga ni 15 ral hmain ennawn (re-evaluation) an dil thei a, subject pakhatah Rs. 1,000 chawi a ngai. Mark belhkhawm a dik em tih ennawn (post publication scrutiny) tura dilnaah chuan subject pakhatah Rs.150 chawi a ngai thung.

Complaint thehlut tur hian subject malah pass mark aṭanga 60% tal an hmuh a ngai. Chumi awmzia chu - pass mark 33 aṭanga 60%, mark 19.56 or 20 tal an hmuh a ngai tihna a ni. Subject pahnih aia tama fail tan re-evaluation dil theih a ni lo. Re-evaluation tih hnuah mark hmuh zat chu 5-a pun emaw, a tlem zawk loh chuan mark hmuh pangngai rin tur a ni.

Zawhna chhangin MBSE hotute chuan, complaint-te chu endik a nih hnuah a ṭhen an pass ṭhat phah a, ṭhenkhat chu an mark hmuh a tlem phah thu an sawi.