Exam paper-ah 'Coding system' hman a ni dawn

Mizoram University hnuaia degree course exam paper endik dan turah Mizoram College Teachers Association (MCTA) phût angin MZU chuan exam paper-ah 'coding system' hman turin a ti ta a; hei vang hian MCTA-te pawhin exam paper-te chu an endik dawn ta nia thu dawn a ni.

Tarlan tawh angin, MZU Examinations department chuan degree course exam paper-te chu code pe loa endik turin a ti a; mahse college zirtirtute pawl, MCTA lamin code pek loh chuan thil dik lo a awm thei dawna an ngaih avangin, code pek ngei an phût a, chuvang chuan exam paper pawh an endik duh lo a ni.

MCTA general secretary Dr PL Ramliana'n Vanglaini palai a hrilh danin, MZU Examination lamin degree course exam answer paper-ah code hman an remti tih a thuphungin an hria, lehkhaa inhrilhna mumal erawh a la awm lo. PL Ramliana chuan, an endik duh loh chhan berah an duh anga thil tih a nih chuan answer paper endik hna chu an thawk mai dawn tih a sawi.

Zawhna chhangin MCTA General Secretary chuan, exam answer paper chu June 9, 2015-ah an endik ṭan theih an beisei thu a sawi a, "Endik hna ṭan har avangin result a chhuah tlai phah ngeiin a rinawm. Mahse kan endik chuan 6th. semester-te leh repeater-te endik hmasakah kan hmang ang a, hmun danga zir zawm duh tan pawh a tlai phah lutuk lo turah kan ngai," a ti.