Bharat Scouts & Guides North East Mini Jamboree CM Duha'n a hawng

Chief minister Lalduhoma, Mizoram Bharat Scouts & Guides president ni bawk chuan November 23, Inrinni khan Bharat Scouts & Guides Mizoram State Training Centre, Tanhrilah Bharat Scouts & Guides North East Mini Jamboree vawi 8-na a hawng.

NE Mini Jamboree hi November 28, 2024 thleng neih tur niin, Mizoramin a thlen vawi hnihna a ni a; India hmarchhak state-te bakah, NE pawn lam state dangte aṭangin Scouts & Guides mi 300 vel an tel.

Bharat Scouts & Guides chief national commissioner Dr KK Khandelwal chuan, Bharat Scouts & Guides tana a thawh hlâwk avangin CM Lalduhoma hnenah award an pek theih sang ber, Silver Elephant Award hlan a nih tur thu a puang a; award dawng tura an rawtna DO letter chu Chief Minister a hlan nghal.

CM Lalduhoma chuan, kal khawmte chu ram tan an thawkho thei tih sawin, "Kan awmna ram bial te, kan ṭawngte leh kan nunphungte chu danglam mah se, inrem takin kan chengho thei a, ram tan kan thawkho thei a, chu chu kan chakna hnâr a ni. Ṭangruala hma kan laknaah chuan kan hlawhtling ṭhin a, Bharat Scouts & Guides-in a thil tum ber pawh ṭangruala India ṭha zawk din a ni," a ti.

Scouts & Guides dintu Lord Baden Powell-a'n, 'Hlimna dik tak neih dan chu mi dangte hlimna siamsak a ni' a tih thu sawiin Chief Minister chuan, "He hun tawi têah hian in ṭhian tharte hlimna thlentu lo ni ṭheuh ang che u," a ti a; Mizorama an chàm chhungin hun nuam tak hmang turin duhsakna a hlan.

CM Lalduhoma hnena Silver Elephant Award hlanna tura rawtna DO letter-ah hian Bharat Scouts & Guides a thawhpuina leh phûrpuina avang te, thil ṭha ti tura ṭhalaite nun kawng kaihruaitu leh tichaktu hruaitu ṭha a nih avangtea chawimawina pek an duh thu a ziak. Award hi India President-in a hlan ṭhin a, hun remchang hmasa berah Chief Minister hnenah hlan a ni ang.