Pa-in fapa kâp hlum

David R Lalduhawma (28) h/o F Lalhunthari, Dinthar, Aizawl chu November 23, Inrinni zan khan a pa, Ralṭhuamliana (48)-in ulhbun silaiin a kap a, a hliam tuar loin zan dar 10:45-ah a thi.

Thu dawn danin, Ralṭhuamliana hian chhungkaw intihbuaina kaihhnawihah a fapa hi zan dar 8:30 vel khan an chenna inah a kâp a, Ebenezer Medical Center panpui nghal niin, zan dar 10:45 ah a hliam tuar loin a thi. David Lalduhawma hi nimin chhun dar 1 khan vui a ni a, a pa Ralṭhuamliana hi police-in an man.

Police aṭanga thu dawn danin, Ralṭhuamliana hian a nupui T Lalhruaithangi kutthlak a tum laiin a fapa David R Lalduhawma'n a nu chu lo chhanin, a pa chu a bawhbet a; Ralṭhuamliana thinrim chuan silai chuhin, a fapa chu a kap ta a ni. Ralṭhuamliana hi nimin khan jail-ah an dah.