YMA-in hâlpuah leh a kaihhnawihte hâl lo turin an veng mipui an ngen

YMA, Armed Veng Branch leh Mission Veng Branch chuan an veng chhung in tinah hâlpuah leh a kaihhnawih thilte hâl lo tura ngenna an sem a, an veng chhunga Whatsapp group-ah an tidarh bawk.

Mizoram sorkarin kumin Krismas leh kumthar lawmna vuakvêtah hâlpuah leh hâlmawi chi hrang hrang zawrh leh hâl a khap tih tarlangin Armed Veng leh Mission Veng YMA-te chuan, "Zuar lui leh hâl luite man an nih chuan dan angin an chungah hmalak a ni ang. Sorkar hnathawk man an nih phei chuan an chungah na leh zuala hremna lekkawh tur a ni," an ti.

Armed Veng YMA chuan, hâlpuah hâl chu ṭul loa sum tam tak sen ralna a ni tih tarlangin, "Boruak nasa taka a tihchhiat bakah mihring leh rante tan natna tam tak thlen theitu a ni. Hâlpuah leh hâlmawi siamna atana an hman zên chi hrang hrangte hi mihring taksaa a luh chuan mihring tan túr hlauawm tak a ni," an ti a, hriselna a khawih pawi theih thu an tarlang.

Hâlpuah leh hâlmawi chuan kum lama upa zawk, damlo, naupang hrisel lo, lungphu ṭha lo, etc. tan harsatna nasa tak a thlen ṭhin tih tarlangin, "Mi dangte tana harsatna siam lo turin mi tin kan inngen a ni. ‘Mizoram boruak chu a la thianghlim e’ tih avanga boruak tihbawlhhlawh tum loin, hâlpuah leh hâlmawi hâl loa Krismas leh kumthar hlim taka hmang turin veng mipuite kan insawmin kan inngen a ni," an ti.

YMA branch pahnihte chuan, an veng chhungah hâlpuah leh hâlmawite zuar lo tur leh hâl lo turin veng mipui an ngen a, an ngenna chu ngai pawimawha zawm ṭheuh turin an chah nghal bawk.