KHAWTHLIR

Home pathum tlawh

Khawzawl district-a naupang enkawlna hmunte endik tura din District Inspection Committee chu November 22, 2024 khan an chairman Lalfakzuala, additional DC hoin an ṭhukhawm. Ṭhutkhawm zawhah Kawnzar Observation Home, Exodus Boys' Home leh Little Wood Girls' Home-te tlawhin, an dinhmun an enfiah bakah, thawktute leh naupangte an kâwm a ni.

Inpho chhuak

Lawngtlai DC office bultumin November 22, 2024 khan Sangau BDO conference hall-ah khua leh tuite ngaihsak-harsatna chinfel ni (Citizen Care - Grievance Redressal Day) thawh lina buatsaih a ni a; mipui dawr theih turin sorkar department hrang hrang leh SBI an inpho chhuak a ni.

ZPM-in chhuang

ZPM party chuan thuchhuah siamin, an party vice president C Lalnunnema'n National Institute of Technology, Mizoram hnen aṭanga khawtlang tana thawh hlawkte chawimawina a dawng chu ropui an tih thu leh an chhuan thu an tarlang. C Lalnunnema hi a thlawna thisen pek kawngah a thawh hlawk avangin November 22, 2024 khan NIT, Mizoram-in chawimawina an hlan a ni.

Milim paih khap

Champhai bawrhsap VL Remliana chuan thuchhuah siamin, Mizoram Prevention and Control of Water Pollution (Precedure for Immersion of ldol) Rules, 2019-in a khap angin Champhai district-a lui leh dilahte lei/mau hmanga siam emaw, hmanraw dang hmanga siam milim paih khap a nih thu a puang. Bawrhsap chuan, "Sakhaw ṭhenkhat, an pathian lim tuia paih turte chuan a hranin dil emaw, tui tlin theihna tur an siam chawp tur a ni," a ti a; dan zâwm lote hrem theih an nih thu a tarlang.

Lei tlahniam tlawh

Lawngtlai bawrhsap Cheemala Siva Gopal Reddy chuan November 23, Inrinni khan Sangau IV-a lei tlahniam tlawhin, Disaster Management & Rehabilitation hnuaia mitigation hnathawh leh hmalak dan a enfiah. DC chuan, lei tlahniamin zual lam a pan lohna tura hnathawh chu thil pawimawh hmasa a nih thu sawiin, sorkara DMR hotute hnenah hmalakpui turin a nawr reng thu a sawi. DC hian Far Pak Self Help Group-te a kawm bawk.