Kawnpui khaw hluia Zotlang ngaw Community Reserve-ah puan a ni

Mizoram State Board for Wildlife hotute chief minister Lalduhoma kaihhruaia November 22, 2024-a CMO conference hall-a ṭhutkhawm chuan, Kawnpui khaw hluia Zotlang ngaw chu community reserve-ah an puang.

Ṭhutkhawmah hian Kawnpui khaw hlui tlang, Kawnpui khawtlangin kum tam tak an lo humhalh tawh Zotlang ngaw, hectare 620-a zau chu Wildlife (Protection) Act, 1972 angin community reserve-a puan remtih a ni a; Thorang Wildlife Sanctuary huam chhunga awm Dampui khua sawn chhuah kal zelah, zangnadawmna la dawng ve lo chhungkaw paruk hnenah a rang lama zangnadawmna pek ni se, an ti.

Pukzing leh Silsury inkar kawng zauhna atan wildlife clearance pek remtih a ni a, National Board for Wildlife-ah thlen (recommend) a ni ang. Ramsain mihring ran vulh a tihhlum palha zangnadawmna pek tur sum AH&Vety department-in an bithliah chu pawm a ni a, a taka kalpui theih tura lo bawhzui turin AH&Vety chu mawhphurhna pek a ni.

Ṭhutkhawmah hian Environment, Forest & Climate Change minister Lalthansanga, adviser to CM TBC Lalvenchhunga, Lunglei West bialtu MLA T Lalhlimpuia leh mi pawimawh dangte an tel.