Mizo hnamte insuihkhawm theih nan UNO-ah memorandum thehluh an rêl

Zo Re-Unification Organisation (ZORO) chuan November 22, 2024 khan MZP Conference Hall-ah Zo fate inrâwnkhawmna hun an buatsaih a; India, Bangladesh leh Myanmar rama Mizo hnam peng hrang hrang ṭhendarha awmte insuihkhawm leh theih nan UNO-ah memorandum thehluh an rêl.

Inrâwnkhawmnaah hian Mizoram bakah, Manipur, Tripura, Assam, Myanmar leh Bangladesh aṭangin Zo hnam péng hrang hrang 27 aiawh an tel a; Myanmar rama MP leh MLA pasarih an tel bawk.

Inhmuhkhawmnaah hian resolution an siam a, "Zo fate India, Bangladesh leh Burma (Myanmar) ram hrang hranga ṭhendarha awmte hian kan insuihkhawm leh theihna turin UNO (United Nations Organisation)-ah memorandum thehluh ṭha kan ti," an ti.

ZORO-in India, Bangladesh leh Myanmar rama Zo fate insuihkhawm lehna tura hma an lo lak tawhna leh UNO an lo dawr tawhnate chu lawmawm an tih thu tarlangin, "Kum 2004 khan ZORO chu UNO-in Zo fa zawng zawng aiawhin a lo pawm tawh a, UNO-a thu thlen tur reng reng chu ZORO hminga thlen ṭhin tawh ni se," an ti a; UNO-a thu thlen tur nei tan ZORO General Headquarters hriattir ṭhin turin an rêl.

Resolution-ah chuan, "Keini Zo fate (Chin-Kuki-Mizo) hi thlahtu thuhmun, ṭawng khat hmang (same langguage - different dialect), nunphung thuhmun, serh leh sâng inkhawih pawlh, beiseina thuhmun vuana dam leh tlang khatah, thih leh ruam khatah ti ṭhin unau kan ni. Unau kan nih angin inṭhen thei kan ni lo a, lungrual tak leh kan insuihkhawm leh theih nan hma kan la zel dawn," an ti bawk.

Inrâwnkhawmnaah hian Zo fate inlungrualna chungchang leh UNO-a ZORO thu thlen tur chungchang sawiho a ni. Hun khatna chu ZORO vice president Rohmingthanga Kawlni-in kaihruaiin, president R Sangkawia'n thu a sawi a; hun hnihna - rorelna hun chu R Sangkawia'n kaihruaiin, ZORO general secretary L Ramdinliana Renthlei leh ZORO Western Zone president Lalnunfela Chawngthu ten thupui an sawi.