VC electoral roll-a inziak lut tur tan khua/vengah ni 180 tal awm a ngai

Village council (VC) inthlan puala electoral roll ennawn tura inpuah­chahna kal zelah November 23, Inrinni khan Champhai IPR Auditorium-ah village level officer (VLO) 66-te pualin training buatsaih a ni. Electoral roll-a inziak lut thar turte chu an inziah luhna tur khua/vengah thla ruk (ni 180) tal an khawsa tawh tur a ni tih tarlan a ni.

Training hi Champhai SDO (Sadar) Ngulza­ṭhuama, election officer ni bawkin a kaihruai a; "Special Summary Revision neih turah hian January 1, 2007 hma lama piang, January 1, 2025-a kum 18 tling chinte ziah luh theih a ni a, inziak lut thar turte chu an inziah luhna tur khua/vengah thla ruk (ni 180) tal an cheng tur a ni," a ti.

Assistant electoral registration officer Dr Van­lal­nunpuii Ralte, district level master trainer ni bawk chuan VLO-te mawhphurhnate a sawi a; DC Office Elec­tion Branch DEO Kawl­hmingliani'n roll revision kaihhnawih form pawimawhte ziah luh dan a sawifiah bawk.