Lokayukta-in thubuai 66 a ziak lut tawh; Thubuai pathum court-in a chingfel tawh

Mizoram Lokayukta chuan din a nih aṭangin eiruk thubuai 66 an ziak lut tawh a; eirûk thubuai pathuma inhnamhnawihte court-in thiam loh a chantir tawh.

March 11, 2019 khan khatih laia Governor Prof. Jagdish Mukhi chuan Mizoram Lokayukta chairman hmasa ber atan C Lalsawta, IAS (Rtd) a la lut a, chuta ṭang chuan Lokayukta hian hna a thawk ṭan a ni.

Lokayukta hian complaint an dawnte chu an zir chian hnua chhui zui zel tlaka an ngaih chuan thubuai an ziak lut ṭhin a; inves­tigation wing an la neih loh avangin Anti Corruption Bureau (ACB) leh Central Bureau of Investigation (CBI) an chhuitir ṭhin.

Tunah hian preliminary inquiry-ah thubuai 15 a awm mek a, chu'ng zinga 13 chu ACB chhui lai niin, pahnih chu CBI-in an chhui mek. Regular investigation la zawh loh thubuai 10 a awm a, a vaiin ACB-in an chhui lai a ni.

Thubuai chhui zawh tawh pasarih chu court-ah thawn a ni tawh a, chu'ng zinga pathumah chuan court-in thutlukna siam tawhin, inhnamhnawihte thiam loh a chantir.

Court-in thiam loh a chantirte chu - thuneihna hmangsuala register firm ni lo contract thawhtir thubuai, Rabung-Aiduzawl Road, Khawzawl-Ngaizawl Road & Khawzawl-Neihdawn Road siamna sum tihchingpen thubuai leh, CADC sum tihchingpen thubuaite a ni.

Lokayukta hian complaint an dawnin an zir chiang hmasa a, chhui zui tlaka an ngaih chuan preliminary inquiry ti turin ACB/CBI-ah an thawn ṭhin a; preliminary inquiry report an dawn hnuah chhui zui zel tlaka an ngaih chu regular investigation ti turin ACB/CBI hnenah an thawn lêt leh ṭhin.

Regular investigation report dawn a nih hnuah hearing-te neiin, court ngaihtuah tlaka an ngaihte chu court-ah an thawn leh ṭhin a ni.

LOKAYUKTA ROREL DANGTE

◆ Complaint an dawn zinga paruk chu an zir chian hnuah preliminary inquiry ngai loah ngaiin an titawp.

◆ Complaint an dawn zinga 10 chu preliminary inquiry report an dawn hnuah chhui zui tlakah ngai loin an titawp.

◆ Complaint an dawn zinga pali chu regular investigation an dawn hnuah chhui zui ṭul loah ngaiin an titawp.

◆ Complaint an dawn zinga pakhat chu disciplinary proceedings tih turin an titawp.