Rajya Sabha MP K Vanlalvena'n President's Rule-ah Manipur dah a duh

November 24, Pathianni khan nimina ṭan tur Parliament thlasik ṭhutkhawm inbuatsaihna atan Delhi-ah All Parliamentary Leaders Meeting neih a ni a; Rajya Sabha MP K Vanlalvena pawh telin, Manipur tualchhung buaina tihtawpna atan Manipur state chu President's Rule-a dah ṭul a tih thu a sawi.

Ṭhutkhawmah hian K Vanlalvena chuan, Mizoram MP ni chunga Manipur chungchang a sawi leh ṭhin chu member dangte hriatthiamna a ngen a, "Nikum May thla aṭanga tun thlengin pawisawi lo tam tak an thi tawh. Manipur-a sorkar laipuiin direct-a hma a lak theih nan President's Rule-a dah chu hna pawimawh hmasa a niin ka hria," a ti.

K Vanlalvena chuan, India rama British lo luh hma aṭangin Zo hnahthlak hnam hrang hrangte Manipur-a an chèn tawh thu leh, tunah pawh Mizo hnam péng hrang hrang 6,00,000 chuang Manipur-ah an awm mek thu a sawi.

Rajya Sabha MP chuan, Mizoram chhehvel ram - Myanmar leh Bangladesh Chittagong Hill-ah inkahna a la awm reng thu sawiin, "Raltlan mi tam tak Mizoramah an awm mek a, chu'ng zingah chuan naupang enkawl ngai tam tak an awm," a ti.

Mizoram MP hian Shillong leh Guwahati-a UNICEF-te chu an ṭangkai phâk loh avangin Mizoramah ngei UNICEF office din a nih theih nana hma la turin sorkar laipui hotute a ngen nghal

a ni.

All Parliamentary Leaders meeting hi Union Parliamentary Affairs minister Kiren Rijiju-a'n a kaihruai a; Union Defence minister Rajnat Singh leh Rajya Sabha leader JP Nanda-te pawh an tel a ni.