ATC-in College Day an hmang

Aizawl Theological College (ATC) chuan nimin khan an hmunah College Day vawi 59-na an hmang. Zirlai ti ṭhate hnenah lawmman hlan a ni a; speaker Dr Tawnenga, Mizoram Christian College principal-in thupui 'Challenge of the 21st century' tih a sawi.

ATC Day lawmna hi Synod moderator Rev. R Vanlalnghaka’n kaihruaiin, kum 1973 aṭanga 2023 thlenga ATC Day-a thupui sawitute thusawi dah khawmna lehkhabu chu Synod Moderator-in a tlangzarh. ATC principal Rev. Prof. Tlanghmingthanga’n report a pe a; Synod senior executive secretary Rev. C Zorammawia leh Synod secretary Rev PB Mankima ten ATC zirlai ti ṭha zualte hnenah lawmman an hlan.

Aizawl Theological College hi kum 1907-ah Rev. DE Jones (Zosaphluia) hoa din a ni a, tunah hian Pathian thu zirna regular course pathum - Bachelor of Divinity (BD), Master of Theology (MTh) leh Doctor of Theology (DTh) a awm a, zirlai 197 an awm mek.

Senate of Serampore College hnuaia páwn lam aṭanga zirna Lay Theological Degree hrang hrang - Bachelor of Christian Studies, Diploma in Christian Studies leh Diploma in Clinical and Pastoral Counselling zirnate a awm bawk.