Politics hi a kal fuh loh chuan chhungkaw tin tan buaina thlentu a ni - Dr K Beichhua, MLA

BJP, Mizoram chuan nimin khan an pisa-ah chhung inkhawm an hmang a, thusawitu Dr K Beichhua, MLA chuan politics a kal fuh loh chuan chhungkaw tin tan buaina thlentu a nih thu a sawi.

Dr Beichhua chuan politics chu ram siamṭhatna tura kawng pawimawh a nih thu sawiin, "Nimahsela politics hi a kal fuh lo a nih chuan chhungkaw tin tana harsatna leh buaina thlentu mai a ni. Khawvel hmun dang politics kan hmuin kan hria a, indona nasa tak chhuah phahna pawh kan hre nual awm e. Chuvangin politics ṭha mipuite hnena chhawp chhuaka pek hi politician-te mawhphurhna a ni," a ti.

Central-a BJP hruaitute chuan India ram mipui tana hna an thawh ṭhat avangin nasa takin India ram chu kan sang tih sawiin BJP MLA chuan, "Central BJP kaihhruai sorkar kal mek hi kan ngaihtuah chiang duh a nih chuan India ram lo enkawl tawhtute'n kum 60 chuang min kaihhruaina aiin kan ṭhang chakin kan changkang fe zawk," a ti a, politics ṭha, mipui thleng phak India ram mipuite min pek thu a sawi.

Dr K Beichhua chuan mihring tam lote awmna state hian tu puihna nge kan mamawh a, mahniin kan mipuite kan khaichhuak thei a ngem tih ngaihtuah chian a ngai ta hle tih sawiin, "Tun huna kalphungthar sorkar siamṭhatna tur atana solution ṭha ber eng nge ni ang, kan tih chuan central sorkar kan zawm mai hi a solution chu a nimai," a ti.

Central India-a thuneitute hnena inngaitlawm taka, Mizoram issue base en chunga kal a ngai tawh tih sawiin Dr K Beichhua chuan, "Mipui aiawha ding thlang tlingtu mipui lam hi kan auchhuah a, hma kan la lo a nih chuan Mizoram hmabak hi a êng lo hle dawn a ni," a ti a, ṭhan dan pangngaia a ṭhan theihna tur chuan a damdawi dik tak a ei a ngaih thu a sawi.