MZU-ah India’s Foreign Policy zirho

Mizoram University-a Political Science department leh ICWA, New Delhi chuan nimin aṭang khan MZU-a School of Social Science Multipurpose Hall-ah 'India’s Foreign Policy: Coping with the changing world' tih thupui zirhona national Sseminar an buatsaih a, Higher & Technical Education minister Dr Vanlalthlana'n a hmanpui.

HTE Minister chuan, policy pawimawh duang tur leh policy a hlawhtlin theih nan zirchianna neih hmasak a pawimawh thu a sawi a, "Ram pawn lam nena thawhhona atana kan policy, foreign policy kan tih mai hi tualchhunga policy kan neih dan nen nghet takin a inkungkaih avangin tualchhung lam hi foreign policy mumal nei tur chuan kan inchinfel hmasak a ngai ṭhin," a ti.

Zirchianna behchhana policy duan a ṭha tih sawiin Dr Vanlalhlana chuan, "Sorkarin eng policy pawh a siam dawn sem ràwn tlâk research work nei tura kan ṭan a ngai," a ti a; research lamah ṭan la turin scholar-te a chah.

Dr vanlalthlana chuan, Mizoram awmna chu geopolitics-ah chuan India ram tana hmun pawimawh a nih thu sawiin, "India tan ASEAN ram kan tih te, Bangladesh, Myanmar leh Indo-Pacific biala ram dangte a dawrna turin kawtchhuah a ni a, dawh zawmtu lei ang pawhin a sawi theih," a ti. Act East Policy leh Indian Foreign Policy-a Mizoram pawimawhna leh Mizoram tana hamṭhatna awm theite uluk taka zir turin kal khawmte a chah a ni.

Seminar-ah hian khualzahawm Amb. Rajiv Bhatia, Mumbai pawhin thu a sawi a; MZU vice chancellor Prof. DC Deka leh state danga university-a mithiamte'n thu an sawi bawk. Zirhona hi vawiinah chhunzawma zawh a ni ang.