MFM School of Nursing zirlaite'n Capping & Lamp Lighting an nei

MFM School of Nursing chuan nimin khan an hmunah zirlai tharte Capping & Lamp Lighting Ceremony an neihpui a, Health & Family Welfare minister Lalrinpuii'n a hmanpui.

Nimina nurse zir thar lukhum khumtir leh bati chhia thu tiamte chu ANM zirlai 18 leh GNM zirlai 30 an ni a; Mizoram State Cancer Institute-a nursing superintendent Lalrinpari'n lukhum a khumtir a ni.

Inkhawma report petu MFM School of Nursing tutor Christina B Lalhmingliani tarlan danin, Auxiliary Nursing & Midwifery (ANM) batch 15 an lut tawh a, kumin aṭangin General Nursing & Midwifery (GNM) zirna bul ṭan a ni. Batch khatah hian ANM-ah zirlai 20 leh GNM-ah zirlai 30 lak a ni ṭhin.

ANM zirlaite chu Synod Hospital, Aizawl Civil Hospital leh Kulikawn Hospital-ahte clinical exposure tihtir an ni a, GNM zirlaite chu Aizawl Hospital, Kulikawn Hospital leh Trinity Hospital-ah clinical exposure tihtir an ni thung.

Christina B Lalhmingliani chuan, MFM School of Nursing aṭangin mi 274 an zir chhuak tawh tih sawiin, chu'ng zinga 80% vel chu Mizoram sorkar hnuaiah an thawk a, Singapore-ah mi 20 leh Japan-ah mi panga an thawh mek thu a sawi.

Kum 2009-a din MFM School of Nursing-ah hian thawktu mi 20 an awm mek a, principal pakhat, tutor pariat, external lecturer pahnih, warden pakhat leh thawktu dang pariat an ni.