KHAWTHLIR

Khapna thupek

Aizawl leh Kolasib district magistrate-te chuan Krismas leh kumthar thleng tur vuakvetah hàlpuah, hàlmawi, meithallàwn (sky lantern) leh silai lem, a mu kap chhuak theite kawl, zawrh, hman leh hàl khapna thupek an chhuah. Thupek bawhchhiate chu BNS 2023 Section 223 hmanga hrem theih an nih thu an tarlang.

VLO training

Hnahthial DC meeting hall-ah nimin khan election officer Esther Leihang kaihhruaiin Hnahthial district-a village level officer (VLO)-te tan nakkum VC inthlan neih tur pualin training buatsaih a ni. Form-3 (e-roll a lut thar thunna), form-4 (e-roll aṭanga in paihna) leh form-5 (e-roll a siamṭhat ngai siamna)-te zirho a ni.

Pawisa lak khap

Aizawl district magistrate Lalhriatpuia chuan thupek chhuahin, Aizawl district-ah pawl/mimal anga state sorkar hriatpuina ni loa lirthei khalhtute hnen aṭanga pawisa khawn/laksak khap a nih thu a tarlang. Magistrate chuan, "Ti lui an awm chuan BNS 2023 Section 308(2)-in a tarlan angin kum 7 tàn emaw, pawisa chawitir emaw, a pahnihin emaw hrem theih a ni," a ti.

MNF inkhawm

MNF chuan nimin khan Mizo Hnam Rûnah chhung inkhawm an hmang a; thusawitu, Mizoram University-a Psychology head of department Prof. Zoengpari chuan, politics-ah duh dan anga thil a lo thlen loh chánga thil thleng hmachhawn thiamte chu rilru hrisel neite an nih thu a sawi a, "Sum ngainatna leh hlemhletnate hi mahni ṭheuhah inteh chhin i la, miin min ngaihdan leh min teh dan hi a pawimawh zawk," a ti.

Khawzawl SFCAC

Khawzawl district-a chhawmdawlna leh ṭanpuina dawng tur naupangte thlang tura din, Sponsorship and Foster Care Approval Committee chu an chairman K Vanlalṭhiana, bawrhsap hoin nimin khan an ṭhukhawm. Sponsorship pek atana rawtnate enho niin, naupangte dinhmun ngaihtuah chungin pek turte thlan a ni a, endik chhunzawm zel tura tih a ni.

DCDC ṭhukhawm

Aizawl District Cooperation Development Committee chu an chairman Lalhriatpuia, bawrhsap kaihhruaiin nimin khan an ṭhukhawm a, hmalak dan tur hrang hrang an sawiho. Bawrhsap chuan, MPACS hmanga Aizawl district-a kut hnathawktute tan hmasawnna leh changkanna thlensak tum turin committee member-te a chah.

Essay inziahsiak

Sorkar laipuiin tribal-te hamṭhatna tura a duan PM-DAJGUA scheme thehdarhna leh tihlarna kalpui mekah nimin khan Champhai district-a higher secondary school zirlaite pualin Champhaia Education Training Hall-ah essay inziahsiak an buatsaih. Zirlai 15 an tel a, thupui chu ‘Tribal nunphung leh hmasawnna tur’ tih a ni.