VC ding lai hun tihtawi a nih chhan LAD Minister-in sawifiah nawn

LAD minister C Lalsawivunga chuan, Mizoram sorkarin village council term kal mek February 19, 2024-a tàwp tura a tih chhan chu state sum leh pai fimkhur tak leh daihzai taka hman duhna vang a nih thu a sawi.

C Lalsawivunga hian nimin khan ZPM pisaa inkhawmah thu sawiin, “VC hun hi tihtawi a ni a, a chhan lian ber pakhat chu kan state sum leh pai fimkhur tak leh daihzai taka enkawl leh hman a ṭul vang a ni. 15th Finance Commission-in recomendation a siam angin state-in ke a pên chho a, Post Devolution Revenue Deficit (PDRD) grant kan dawn dan tur pawh mumal takin siam a ni," a ti.

LAD Minister sawi danin, Mizoramin kum 2023-24 khan PDRD grant thla tin cheng vbc. 122.83 a dawng a, kumin 2024-25 ah vbc 89.91 thla tinin a dawng a, 2025-26 ah chuan vbc 48.83 a dawng dawn. 15th Finance Commission-in rawtna a siam angin Mizoramin PDRD grant a hmuh chu a tlahniam zel a ni.

Mizoramin sum a neihte chu thiam tak leh fimkhur taka hman a ngai tih sawiin Lalsawivunga chuan, "Kum tharah VC leh LC inthlan neih a ngaih dawn a, kum tawpah LADC inthlan kan hmachhawn leh mai dawn a, 2026 kum tir lamah AMC inthlan buatsaih a ngai dawn bawk," a ti a; state dinhmun ngun taka thlir chungin inthlan pawimawh tak tak hmachhawn turte chu ngaihtuah a ṭul thu a sawi.

C Lalsawivunga chuan, mipui nghawng lo thei ang bera inthlanna kalpui turin sorkarin ruahmanna siam a tum tih sawiin, "Kum 2020-ah Covid-19 kan hmachhawn avangin VC term pawhsei a ni a, tunah erawh Covid-19 a reh tawh avangin VC inthlan hun siam rem turin sorkarin ruahmanna a siam ta a ni," a ti.

Beihna nasa tak tawk mah se ZPM party leh sorkar a an nghîng lo lo nia sawiin C Lalsawivunga chuan, "Ram rorelnaah Pathian ram tun din hi kan tum ber a nih miau avangin hetah hian kan ding nghet a, kum tam tak chhunga an tih theih loh kha keini chuan Pathian chakna ringin kum khat pawh tling loah kan ti chho mawlh mawlh a ni," a ti bawk.