Hmeichhiate pawimawhna zirhona buatsaih

Control Arms Foundation of India, Manipur Women Gun Survisvors Network, Northeast India Women Initiatives for Peace leh Mizoram University-a Department of Public Administration-te chuan nimin khan Hotel Regency conference hall-ah hmeichhia­te pawimawhna chungchang zirhona an buatsaih a, chief minister Lal Thanhawla’n a hmanpui.

‘The importance and role of women in decision making forums and space: Peace and development in Mizoram’ tih thupui zirhonaah hian thu sawiin Chief Minister chuan, Manipur nula chhuanawm tak Bima Lakhsmi Nepram a tel ve chu a lawmawm thu a sawi a, “Bima Lakhsmi Nepram hi hmarchhak bial mipuite hruaitu, ralthuam tihbo duhtu leh sûlsutu a ni,” a ti.

CM Lal Thanhawla chuan, UN Security Council Resolution 1325 leh Convention on the Elimination of All Forms of Atrocities Against Women (CEDAW) chungchang sawiho tura an chhawp chhuak chu mipa leh hmeichhiate intluk tlân theihna tura hmalakna kawnga hmanraw remchang tak a nih thu a sawi.

Lal Thanhawla chuan, Kristiannain hmasawnna kawngah Mizote a hruai angin, hmeichhiate tan pawh kawng a sial tih a sawi a, chutih rualin, hmeichhiate chunga hleilenna a la awm fo nia sawiin, “Hetiang hi a thlen lohna turin mipuite inzirtir a, inhrilhhriatna tam zawk media hmanga thehdarh leh dan siamte a ṭul,” a ti.

Chief Minister chuan, inthlan dawn apiangin hmeichhia chakna chang thei ngei tur an zawng ṭhin a, mahse an váng hle niin a sawi a, “Mizoram Judicial Service-ah te, Mizoram Police Service-ahte erawh chuan hmeichhiate tan seat hauhsakna awm miah si loin an lut ṭeuh zel a ni,” a ti.

Khualzahawm LR Sailo, IIMC Aizawl Centre special officer chuan, inthliarna leh inenhranna vangin hmarchhak mite, a bikin hmeichhiate chungah tharum thawhna leh hleilenna India ram hmun hrang hrangah a thleng fo tih a sawi a, “India khua leh tui ni loa min hmuh vang niin a lang a, India mi dik tak kan nih hi an hriat a hun hle a ni,” a ti.

Meeting-in a tum ber chu, UN Security Resolution 1325-in hmeichhiate dinhmun chawikan a, remna leh muanna kawng dapnaahte leh hmasawnna tur ruahmanna kawngahte hmun an chan ve a, an thu ngaihthlaksaka pawmsak a nih theihna tura hmalak dan tur sawiho a ni.