A Sawibunga thubuai Aizawlah sawn

Mizoram Bru Displaced People Forum (MBDPF) president laka Mamit Sub-Headquarters YMA-in Mamit District Court-a petition an thehluh chu Gauhati High Court-in Aizawl District Court-a ngaihtuah turin a dah.

The Times of India, January 17, 2014-a chhuakah Mizo mipuite'n Bru-te kutthlakin an khua aṭangin an hnawtchhuak angin tarlan a ni a, chu thu chu MBDPF president A Sawibunga'n Times of India correspondent a hrilh anga ziah a ni. YMA sub-hqrs, Mamit chuan A Sawibunga chu dâwta Mizo mipuite hêkah puhin, Court-ah thubuai an thehlut ta a ni.

Mamit District Court chuan A Sawibunga chu Court-a inlan turin ṭum hnih a hriattir a; mahse a inlan loh ve ve avangin Mamit Senior Civil Judge-in August 28, 2014-ah A Sawibunga manna thupek a tichhuak a, police-te chu A Sawibunga man a, September 19, 2014-a Court-a hruai turin thu a pe a ni.

Police-te'n A Sawibunga chu September 18, 2014-ah Court-a an hruai theih loh avangin Court chuan September 19, 2014-ah manna thupek dang a chhuah leh a, Sawibunga chu October 14, 2014-a Court-a hruai ngei turin police-te a hriattir a; mahse police-te'n an tihlawhtling lo.

A Sawibunga hi Gau­hati High Court, Aizawl Bench-ah a zualko a; a tan Mamit-ah kal ngam a ni loa sawiin, a thubuai chu Mamit ni loa ngaihtuah a dil a ni. Gauhati High Court judge PK Phuken chuan May 20, 2015 khan order chhuahin, A Sawibunga thubuai chu Chief Judicial Magistrate, Aizawl ngaihtuah turin a dah ta a ni.

Aizawl CJM Court chu a hmasa ber atan A Sawibunga case chu June 26, 2015-a ngaihtuah tura tih a ni a; chumi hun­ah chuan A Sawibunga pawh inlan tura tih a ni.