Lawngtlai district-a hna thawh thlirlêt

Lawngtlai District Vigilance and Monitoring Committee (LDVMC) chu nimin khan an chairman CL Ruala, Lok Sabha MP hoin an ṭhukhawm a; kumin January 21 aṭanga May 22 thlenga Lawngtlai district-a hmasawnna hna thawh hrang hrang an thlirho.

CL Ruala chuan, Central-ah sorkar a inthlak avangin sorkar laipui leh state indawr dan kal­phung a danglam deuh hlek tih a sawi a, “Policy leh programme kalpui dante pawh a ṭhen a zár thlak hlek hlek a ni a, chuvang chuan chak taka hnathawh a har rih deuh thei a ni,” a ti.

Meeting-a tarlan dan­in, Lawngtlai district-ah hian kumin (2015) chhungin MGNREGA hnuaiah chhungkaw 27,442 tan ni sarih inhlawhna siam a ni tawh a, chuta tan chuan cheng nuai 782.837 hman a ni.

Vector Borne Disease Control Programme hnuai­a sikserh dona bik­ah January-May inkarah malaria PF vei mi 964, malaria PV vei mi 65 hmuhchuah a ni a, sikserh vanga thi an la awm lo.

Meeting-ah hian Lawngtlai district bial­tu MLA pathum - C Ngunlianchunga, Dr BD Chakma leh H Zothangliana te pawh an tel a ni.