PUC-in zirlai chhuakte an thlah

Pachhunga University College (PUC) chuan nimin khan an zirlai kal chhuak turte pualin an college-ah ‘Graduation Dinner’ an buatsaih. Zirlai an thlahte hi mi 515 an ni.

PUC principal Dr Tawnenga chuan fuihna thu sawiin, “A êng lam kawng chauh ngaihtuah a, rinawm taka engkim ti tur leh dikna din chhuahpui a, mi dangte tana tangkai tak ni zel turin ka duh che u. Zirna sang zawk in zir hunah pawh hnung lama in thil tih dik tawk lohte theihnghilh a, hma lam panin theihtawp chhuah ang che u,” a ti.

PUC hian zirlai thiam theite leh dâwm kan ngaite tan scholarship hrang hrang an nei a; physics, mathematics leh chemistry zirlai pathumte tan SEL Foundation-in thla tin scholarship Rs. 1,500 an pe a, Zoram Educational Trust-in physics zirlai pakhat tan thla tin Rs. 1,000 an pe bawk.

B.A exam-a ti ṭha ber hnenah HK Bawihchhuaka Award Rs. 10,000 leh trophy, B.Sc.-a ti ṭha ber hnenah Dr H Lallungmuana Award Rs. 10,000 leh trophy-te pek a ni.