Police-in Aizawlah hâlpuah an man

Mizoram Police chuan November 25, Thawhṭanni khan Aizawla hmun pahnihah hâlpuah, hâlmawi leh silai lem a mu kap chhuak thei an man a, a vaiin cheng nuai 10.23 hûa chhût a ni.

Vanglaini thu dawn danin, police-te chuan November 25, Thawhṭanni khan Sahidul Alam (28) s/o Kamar Uddin, Karimganj, Assam, tuna Dawrpuia khawsa mekin kudam atana a luah P&Sons building, Dawrpuiah hâlpuah leh hâlmawi chi hrang hrang 36 an man a, Rs 9,10,371 hû a ni. Police-te chuan Sahidul Alam pawh manin, thubuai an siamsak a, mi dang kaihhnawih a neih leh neih loh an chhui zui mek.

Police-te chuan Thawhṭanni vek tlai lam khan Lalkhawmawia (34) s/o Lalrosanga, Chawlhhmun nia inchhâl laka Aizawl District Magistrate-in FIR a thehluh an bawhzui a, hâlpuah, hâlmawi leh silai lem a mu kap chhuak thei eng emaw zat an man.

Lalkhawmawia hnen aṭang hian halpuah, halmawi leh silai lem a mu kap chhuak thei chi hrang hrang 51 man a ni a, a vaiin Rs 1,20,000 hûa chhût a ni.

Police-te chuan November 23, 2024 khan Khatlaah Lalrinfeli w/o Lalramngaia, College Veng, Aizawl hnen aṭangin hâlpuah leh hâlmawi chi hrang hrang báwm 3 an lo man tawh bawk.

Aizawl SP thuchhuah chuan, sorkarin dan leh thupek a neihte ngai pawimawha zawm turin mipui an ngen tih a tarlang a, "Dan phal loh thil la lut leh zuar an awm leh awm loh enfiah hna ngawrh takin kan kalpui zel dawn a, dan bawhchhia mante chu dan angin an chungah action lak zel a ni ang," a ti.