A huna thleng lo leh haw hmate casual leave paih ṭhensak dawn

Mizoram sorkar chuan sorkar hnathawk, pisa ṭan huna pisa thleng lo leh bàn hun hmaa hawte chu ni thum chhung an tlai emaw, haw hma apiangin an casual leave paihsak zel turin a ruahman.

GAD-in office memo­randum a tihchhuaha tarlan danin, sorkar hnathawkte chu ni thum chhung pisa an tlai emaw, bàn hun hmaa an haw apiangin an casual leave aṭangin ni chanve (half day) paih zel tur a ni.

Hetih lai hian, Central Secretariat Manual on Office Procedure: Office Management angin, darkar khat aia rei loa an tlai a, an tlai chhan thuneitute'n an pawm chuan thla khatah ni hnih ngaihhnathiam theih a ni thung.

Pisa tinte chu Kai application hmang vek tura tih an ni a; department/office tina hotu berte chu an hnuaia thawkte pisa kai hun leh haw hun vil tur leh, pisa kai hun chhunga pisa chhuahsan leh bàn hun hmaa haw remti lo tura hriattir an ni bawk.