Minister-in press tour-a kal turte vailiam

Mizoram sorkarin IPR department kaltlanga Press Tour a buatsaiha kal turte chu nimin zing khan IPR minister Dr Vanlalthlana'n IPR directorate Lianchhiari Rûn kawt aṭangin a vailiam.

Vailiamna inkhawm tawi buatsaihah Dr Vanlalthlana chuan, Press Tour-a kal turte duhsakna hlanin, ram leh hnam tana thil ṭha leh ṭangkai zir chhuah neih tum ngei turin a chah a, "Anni neih, kan neih si loh te, kan ram tana ṭangkai tur leh ṭha tur rawn hmu chhuak u la, sorkar leh ram mipui tana hmasawnna tur rawn puak chhuah tum ang che u," a ti.

IPR Minister chuan, rualawhnain hmasawnna a kaihruai tih sawiin, Mizoram tana rualawhna ṭha puak chhuah tum turin a chah a, a bik takin Sikkim state-in tourism lam an kalpui dan Mizoram tana ṭangkai turte uluk taka chhinchhiah turin a fuih bawk.

Tun ṭum Press Tour-ah hian MJA aṭangin mi 10 leh IPR department aṭangin official pahnih telin, Sikkim-a hmun hrang hrang an tlawh dawn a, November 30, 2024-ah Aizawla rawn lêt leh tura beisei an ni.