Civil Hospital, Aizawl blood bank-ah thisen lakna apheresis khawl thar

Civil Hospital, Aizawl Blood Centre tana Ashraya Hastha Trust, Bengaluru-in thisen lakna khawl chi khat, apheresis machine an pek chu nimin khan Ashraya Hasta Trust director NK Sharma-a'n Health minister Lalrinpuii hnenah a hlan.

Apheresis khawl hlanna inkhawm hi Civil Hospital, Aizawl medical superintendent Dr ST Lalruatfela pisaah neih a ni a; Health Minister chuan, apheresis khawl hmangin damloin thisen ṭhen hrang hranga a mamawh chiah lak chhuah theih a nih thu a sawi.

Lalrinpuii chuan, "Apheresis khawl chuan thisen component mamawh chauh a lak chhuah zawhah, a lak chhuahna hnu thisen bâng zawng kha donor hnenah a pe lêt leh dawn a ni. Damloin mi dang dang thisen a dawn a ngaih tawh dawn loh avangin natna inkai chhàwn palh theih lakah pawh a him zawk tawh dawn a ni," a ti.

Health minister Lalrinpuii chuan, Association for Voluntary Blood Donation (AVBD) leh mimal tlawmngaite'n theihtawp chhuahin thisen pek lamah ṭan la mah se, damlote mamawh ang tak phuhrûk zawh a harsat thu a sawi a, chuvang chuan blood centre-a thisen lakte chu inrenchem taka hman a ngaih ṭhin thu a sawi.

HFW Minister chuan, Mizoramin apheresis khawl a mamawhzia hriaa an dilna Ashraya Hasta Trust-in an lo pawmsak chu a lawm thu sawiin, hun lo kal zel turah pawh ṭanpui chhunzawm zel turin Ashraya Hasta Trust hotute a ngen a; Civil Hopital blood centre-a thawkte chu fimkhur leh dimdawi taka khawl enkawla hmang turin a chah.

NK Sharma pawhin thu sawiin, apheresis khawl Civil Hospital, Aizawl hnena an pe thei chu an lawm thu sawiin, "Hetianga ke kan pên theih nan a kawng lo sialtu, Bengaluru-a kum tam tak lo awm tawh Health minister Pi Lalrinpuii hnenah lawmthu ka sawi a ni," a ti.

Sorkar thuchhuah tarlan danin, apheresis khawl hi cheng nuai 60 vel man a ni.