KHAWTHLIR

Hâlpuah khap

Lunglei district magistrate Navneet Mann chuan thupek chhuahin, Krismas leh kumthar vuakvetah hâlpuah, hâlmawi, sky lantern leh silai lem, a mu kap chhuak thei chite lak luh, zawrh, hralh, hâl leh hman khap a nih thu a puang. Thupek zâwm lote chu BNS 2023 Section 223 hmanga hrem theih an ni.

US palaiin tlawh

US Consulate, Kolkata-a consular officer Karl Mercer chuan nimin khan Mizoram University a tlawh a, MZU-a School of Education-in an lo dawngsawng. Karl Mercer chuan, USA-a ram dang aṭanga zirlai kal zinga 25% chu India aṭanga kal an nih thu sawiin, "India leh US-in zirnaah inkungkaihna chak tak kan nei a, kan tum ber pakhat chu zirlaite visa neih theihna kawng zawnpui a ni," a ti a; student visa neih theih dante zirlaite hnenah a hrilhfiah a ni.

AR-in heroin man

Assam Rifles-te chuan November 25, Thawhṭanni khan Melbûk khaw bul, Ṭiau lui Thingruang kaiah heroin gram 258 an man a, heroin kengtu Vanbiakmanga (42), Myanmar lam mi an man nghal bawk. AR sipaite hian Vanbiakmanga'n Kenbo bike hmanga Ṭiau lui kân a tum laiin an dap a, heroin an hmu chhuak a ni.

Rate aia sanga hralh leh lei khap

Siaha additional district magistrate Abraham Beirazi Khithie chuan thupek chhuahin, Siaha district-ah tuialhtheite sorkarin a man a bithliah aia sanga hralh leh lei khap a nih thu a puang. Thupekah chuan, tun hnaiah Siaha district-ah dan loa petrol leh diesel zawrh leh hralh a hluar thu te, petrol pump aṭangin mahni mamawh zat aia tam bûr hmanga lak phal loh a nih thu te, Myanmar leh ram dangah hralh chhàwn khap a nih thu te, thupek bawhchhiate chu hrem theih an nih thute tarlan a ni.

DIG-in hna zawm

Mizoram sorkarin DIG (Southern Range) tura a ruat thar Altaf Ahmad Khan, IPS (2010) chuan nimin khan DIG (SR) ni mek C Lalthanmawia, IPS hnen aṭangin mawhphurhna a la.