Ram tan kan thawk a, inpe ang u - Chief Minister

Chief minister Lalduhoma kaihhruaiin nimin khan Secretariat conference hall-ah School Education department hmalaknate thlir letna, review meeting neih a ni. CM chuan, sorkar hnathawkte chu office hun chhung piah lamah pawh office hna thawk hreh lo tur leh ram tana inpe turin a chah.

CM Lalduhoma chuan, hmasawnna hna thawh vat vat an duh tih sawiin, "Sorkar hnathawkte'n office hour piah thlenga hna thawh i hreh lo ang u. Central Secretariat ka tlawh fo a, an peon file kengte thlengin an kal hne hne ngai lo. Zan dar 8 thlenga office-a awm hi kalphung nghet ang maiin an nei a, over time allowance an phût pawh kan hre hran lo. Kan ram tan kan thawk a, inpe

ang u," a ti.

Thil dik lo zawnga review meeting buatsaih an nih loh thu sawiin Lalduhoma chuan, "Kan dinhmun dik tak leh hnathawh dante hriat chian kan duh ber a, a ṭul angin thil fel lo awmte kan sawiho zel ang," a ti a; review meeting chu CM Office aṭangin chhinchhiah zel a nih thu leh minutes-te chu bawhzui ṭhat a nih leh nih loh rang taka hriat ṭhin an duh thu a sawi.

Chief Minister chuan, Mizoram sorkarin a din Mizoram State Project Monitoring Committee-in Mizorama hna thawh mek 40 vel an endik tawh thu leh siamṭhat ngai an hmuh ṭhin thu a sawi a, "Kan sorkar ve chin aṭang hi chuan project kan thawhte hi a nihna tur ang taka thawh leh bawhzui ni ngei se kan duh a, kan khauh dawn," a ti.

School Education review meeting kaihruaitu Education minister Dr Vanlalthlana chuan, CM-in department-te hmalakna enpui tura ṭhutkhawm a buatsaih chu tun hma lama la awm ngai lo, thil thar a nih thu a sawi a; School Education department hotute review meeting a neihpui thei chu an lawm thu leh an phûr thu a sawi bawk.

Review meeting-ah hian adviser to CM TBC Lalvenchhunga, Education Reforms Committee working chairman Prof. Lalbiakdiki Hnamte, CM secretary Vanlaldina Fanai bakah, Planning & Programme Implementation leh School Education department hotute an tel a ni.