Minister-in Road Safety Week a hawng

Zoram Drivers’ Union (ZDU) chuan nimin aṭang khan lirtheia fimkhurna leh himna hapta, Road Safety Week vawi 43-na an hmang ṭan a, Transport minister Vanlalhlana'n Bawngkawna ZDU pisa kawtah a hawng.

Transport Minister chuan, Road Safety Week chu mipui hnena fimkhur ngaihna leh himna turte hriattir nawnna hun a nih thu a sawi a, "Lirthei hi mihring tana pawimawh a ni a, a khalhtute fimkhur loh vang emaw, puitlin tâwk loh vangin chhungkaw tam takin vanduaina, thihna hialte an tawh phah ṭhin. Road safety kan tih hian lirthei khaltute tan chauha ngaihna a awm ṭhin a, kawngpui hmangtu zawng zawng - driver, passenger leh kea kal ṭhinte a huam vek a ni," a ti.

Kawngpui hman danah thil hotê avangin vanduaina tawh theih a nih thu sawiin Vanlalhlana chuan, "Kan rilru kan lâk pèn zeuh vang te, hun rei lo tê kan nghah theih loh avangtein dam chhung atan vanduaina tawk emaw, nunna chán an awm phah fo," a ti a; lirthei khalhtute chu an fimkhur reng a ngaih thu a sawi.

Minister chuan, "Sorkarin infrastructure ṭha zawk siamin, dan tharte duangin, a lekkawh lamah ṭan la mah se, kawngpui hmangtute'n an thlawp si loh chuan him zawk tura kan hmalaknate hian awmzia a nei thui lo ṭhin," a ti a; mahni bakah mi dang thlenga thui tak nghawng thei thilte ngaihtuah chian a ṭul thu a sawi bawk.

Road Safety Week hawnna inkhawm hi ZDU president F Dosanga'n a kaihruai a, Transport department leh Aizawl Traffic Police aiawhte bakah lirthei pawl hrang hrang hruaitute an tel.

Kumin Road Safety Week thupui chu, 'Fimkhur la, nun chhanhim rawh' tih a ni a, December 3, 2024 thleng hman tur a ni. District khawpui dangahte pawh nimin khan Road Safety Week hawn a ni bawk.