Ngengpui tlang kaltlanga kawng siam dan tur sawiho

Lawngtlai bawrhsap Cheemala Siva Gooal Reddy kaihhruaiin November 25, 2024 khan sorkar hotute leh khawtlang hruaitute'n Ngengpui tlang kaltlanga Bungtlang leh Tuithumhnar inkar kawng laih tur an sawiho a; social impact assessment ti kher loa kawngpui siam hna ṭan ṭha an ti.

Lawngtlai DC chuan, inkalpawhna kawngpui ṭha zawk siam a nih chuan a chhawrtu tur chu kawngin a paltlang khuate an nih thu a sawi a, "Kawngpui laih turah harsatna siam awm lo a, a hma lama hnathawh ṭan a pawimawh," a ti a; kawngin a paltlang tur khuaa village council leh tlawmngai pawlte chu thil ṭha an neih turah ṭhahnemngai taka sorkar leh kawng siamtute thawhpui thiam tur leh enpui zui ṭhin turin a chah.

Ṭhutkhawmah hian kawngpuiin a paltlang tur khuate'n social impact assessment neih ngai an tih leh tih loh sawiho a ni a; VC leh NGO-te chuan kawngpui ṭha tak an nei tur chu an lawmthu an sawi. Social impact assessment ti kher loa kawngpui siam hna ṭan chu ṭha berah ngaiin lungrual takin an pawm a ni.

Bungtlang - Ngengpuitlang - Tuithumhnar inkar kawng hi tuna kawng kal danah chuan km. 48-a thui a ni a, kawng thar (defence road) siam tur hi a puitlin chuan km. 16-a thui a ni tawh dawn a ni.